Sunday, August 25, 2013

ஈரல் சாப்பிடலாமா? கூடாதா?

ஈரல் சுவைக்கு பலர் அடிமையாகிவிட்டார்கள் என்றே சொல்லவேண்டும்.ரொம்ப மென்மையாக அப்படி ஒரு ருசிஎன்று சொல்லக் கேட்டிருக்கிறேன்.வீட்டில் கோழி அறுத்தால் ஒரு துண்டு ஈரல் கிடைக்கும்.சிலர் சுட்டு தின்பார்கள்.குழம்பில் போட்டால் தனியாக மிதக்கும். கறி  வெந்த பிறகு கொஞ்ச நேரம் கழித்து போட .வேண்டும்.


ஆட்டு ஈரல் கடைகளில் சாதாரணமாக கிடைக்கும்.இப்போது சிக்கன் கடைகள் முளைத்தபின்பு கோழி ஈரலும் எங்கும் கிடைக்கிறது.நண்பர் ஒருவர் சொல்லிக்கொண்டிருந்தார்,'' கோழி ஈரல் சாப்பிடக்கூடாது பாஸ் " ஆட்டு ஈரல் சாப்பிடலாம் என்றார்.ஆனால் அவரால்  காரணத்தைச்  சொல்லி விளக்க  முடியவில்லை. 

வீதிதோறும் அசைவக் கடைகள் பரவிவிட்ட நிலையில் இப்போது ஈரல் கிடைப்பது  சுலபம்.ஆனால் நண்பர் சொன்னது போல பலருக்கு குழப்பம் இருப்பதை கவனித்திருக்கிறேன்.உயிர்ச்சத்துக்களை சேமித்து வைத்து தேவையானபோது வழங்குவது ஈரலின் முக்கிய பணி.முக்கியமான ஊட்டச்சத்துகளை கொண்டிருக்கிறது ஈரல்.

அனைத்து உயிர்ச்சத்துக்களும் இதில் உண்டு..குறைந்த அளவில் முழுமையான சத்துக்களை கொடுக்கும் வேறு உணவைக் குறிப்பிட   முடியாது.இரும்பு,செலினியம்,துத்தநாகம் என்று பயனுள்ளவை அதிகம் இருக்கிறது.ரத்த சோகையால் பாதிக்கப்பட்டவர்களுக்கு நல்ல உணவு.போலிக் அமிலமும்,பி 12 உயிர்ச்சத்தும்  இதன் சிறப்பு.

அதிக ஏ வைட்டமின் காரணமாக கர்ப்பிணிகள் தவிர்க்கவேண்டும் என்று சொல்கிறார்கள்.ஆனால் ஊட்டச் சத்து பற்றாக்குறை உள்ள நம் நாட்டில் மிகு விட்டமின் காரணமாக பாதிப்பு ஏற்படும் என்று சொல்ல முடியாது. ஈரல் சாப்பிடும் அன்று ஏதேனும் காரணங்களுக்காக விட்டமின் மாத்திரை எடுப்பவர்கள் அன்று தவிர்த்துவிடலாம்.

எதிரான விஷயம் என்று பார்த்தால் கொலஸ்ட்ராலை குறிப்பிடலாம்.ஆட்டு  ஈரலில் கொஞ்சம் அதிகம். கொலஸ்ட்ரால்  பிரச்சினை உள்ளவர்கள் தவிர்க்க வேண்டும்.மற்றவர்களும் ஒரு முழு பூண்டை தட்டி உடன் சேர்த்துக்கொள்ளலாம்.பூண்டு  கொலஸ்ட்ராலை குறைக்க உதவும்.

பொதுவாக கலர் பவுடர் தூவப்பட்ட சிக்கன் கடைகளில் சாப்பிடுவது ஆரோக்கியமானதல்ல! சாலையோரக் கடைகளில் அனுமதிக்கப்பட்ட வண்ணங்கள் இருக்கும் என்று சொல்ல முடியாது.உணவகங்களில் பதப்படுத்தப்பட்ட ஈரல் இருக்க வாய்ப்புண்டு.ஈரல் மட்டுமல்ல,அசைவ உணவுகளை வீட்டில் தயாரிப்பதே மிகச் சரி.
-

4 comments:

காமக்கிழத்தன் said...

பயனுள்ள தகவல்.

நன்றி.

Anonymous said...

சிறு வயதில் ஈரலைக் கண்டால் குமட்டிக் கொண்டு வரும், ஆனால் பிறகு ஈரல் தின்னத் தொடங்கி விட்டேன், அதனை கொஞ்சம் நீர் விட்டு, உப்பு, மிளகாய் தூள், மஞ்சள் போட்டு வேக வைத்து, நீர் வற்றியதும், மிளகாய், பூண்டு, வெங்காயம், இஞ்சி நறுக்கிப் போட்டு, சிறிது எண்ணெய் விட கொஞ்சம் வேகியது போல, கொஞ்சம் பொரிந்தது போல வரும். ம்ம்ம். அருமை. அதன் ஊட்டச்சத்துக்கள் மிகுதி, வாரம் ஒருமுறையோ, மாதமிருமுறையோ உண்ணலாம். கோழி ஈரல் சுவை கூட, ஆரோக்கியமானது. :))

MaaththiYosi Jeevan said...

அண்ணா, எனக்கும் முன்பு ஈரல் சாப்பிடுவதென்றால் உவ்வே தான். இப்போது கொஞ்சம் கொஞ்சமாக கோழி ஈரல் சாப்பிட தொடங்கியுள்ளேன். ஈரல் சாப்பிடுவதால் அதிக நன்மைகள் இருக்கும் என்று கூறுகிறீர்கள்!

சரி இனி மெல்ல மெல்ல வாயில் வைக்கிறேன் :)))

மகேந்திரன் said...

அதிகம் விரும்பி சாப்பிடும் பொருள் இது...
மேலதிக தகவல்களுக்கு நன்றிகள் பல நண்பரே...