பெண்ணுக்குத் தோல்வியென்றால் என்ன நடக்கும்?

பதிவைப்படித்த பின்பு ஒருவர் தொடர்பு கொண்டிருக்கிறார்.பெண்களுக்குக் காதல் தோல்வியென்றால் பிரச்சினை இல்லை.உடனே யாரையாவது பிடித்துவிடுகிறார்கள்.தற்கொலையெல்லாம் செய்து கொள்ளமாட்டார்கள்.இது என்னுடைய அனுபவம். என்று குறிப்பிட்டிருக்கிறார்.மேலும் அவர் விளக்கம் அளித்திருந்தால் நன்றாக இருந்திருக்கும்.ஒருவேளை மீண்டும் அவர் முயற்சி செய்து வெற்றிக்காதலாக மாற்றியுமிருக்கலாம்.

காதல் தோல்வியில் உணர்ச்சிப்பூர்வமான பாதிப்புகள் இருவருக்கும் இருக்கிறது.ஆனால் எதிர்கொள்ளும் விதம் இருவருக்கும் மாறுபடும்.காதல் தோல்வியென்பது பெண்ணுக்குக் குறைவுதான்.காதல் தோல்வியால் திருமணத்தை மறுத்து வாழும் பெண்களையும் நான் பார்த்திருக்கிறேன்.உண்மையில் ஆண் இன்னொரு காதலை உருவாக்குவது கொஞ்சம் கஷ்டம். பெண் உடனே இன்னொரு ஆணுடன் பழகுவது சாத்தியம்தான்.அதை உறுதியாக காதல் என்று சொல்லிவிடமுடியாது.

இன்னமும் நம் சமூகத்தில் அழகு ஒரு முக்கியமான விஷயம்.தோழிகளிடம் தன்னுடைய இமேஜ் குறையும்.சிலர் கேலியாகப் பார்க்கக்கூடும்.இன்னொரு ஆணுடன் நெருக்கமாக்க் காட்டிக்கொள்வதன் மூலம் பொறாமையை தூண்டலாம் என்பதும் ஒரு காரணம்.தான் ஒரு ஆணால் விரும்பப்படுகிறோம் என்ற எண்ணமே பெரும் ஆறுதலாகவும் இருக்கும்.இன்னும் காதலனுக்கு ஆகாதவனாக இருந்தால் சிறப்பு.

காதலன் சரியாக கவனிக்காத நிலையில் கூட இப்படி நடந்துகொள்வதுண்டு.அப்புறம் ஆண் அடித்துக்கொண்டு ஓடுவான்.பொறாமையால் உந்தப்பட்டு காதலை உறுதிப்படுத்துவான்.இம்மாதிரியான விஷயங்கள் கல்யாணத்துக்குப் பின்னர் பிரச்சினை ஆகிப்போனதும் உண்டு.இருவருக்கும் ஏதாவது பிரச்சினை என்றால் மனைவி அவனுக்கு போன் செய்து பேச ஆரம்பிப்பார்.அடிக்கடி தொடர்ந்து பிரச்சினையாக உருவெடுப்பதும் நடக்கும்.

நண்பர்களையே எதிரியாக்கவும் பெண்ணால் முடியும்.எதிரியாக இருப்பவர்களை நெருக்கமாக்கிக் கொள்ளலாம்.தோற்றுப்போகும் சூழ்நிலை வரும்போது அல்லது தோல்விக்குப்பிறகு இது நடக்கலாம்.மனதின் தற்காப்பு பற்றி முந்தைய பதிவொன்றில் சொல்லியிருந்தேன்.அவனுக்கு ஆகாதவனுடன் பழகுவதால்தான் தன்னைப்பிடிக்கவில்லை என்று சொல்லிக்கொள்ளலாம்.உடனிருப்பவர்களை நம்பவைத்து தனது சுயமதிப்பை அதிகரித்துக்கொள்ள இது ஒரு வழி.

அதிகாரி ஒருவர் அந்தப்பெண்ணிடம் அடிக்கடி பேசிக்கொண்டிருப்பார்.அவர் காதல் பற்றி எதுவும் பேசவில்லை.ஆனால் தோழிகளிடம் அது காதல்தான் என்று சொல்லிக்கொண்டார்.வேறு என்னத்துக்கு அடிக்கடி வந்து பேசவேண்டும்? ஆனால் காலங்கள் கழிந்த பிறகும் அவர் எதுவும் சொல்லவில்லை.அலுவலகத்தில் ஒருவருடன் சிரித்துசிரித்து பேச ஆரம்பித்தார். அவர் அடிக்கடி சரியாக பணிபுரியாமல் அதிகாரியால் நடவடிக்கை எடுக்கப்பட்டவர்.

அதிகாரி அவரை பாராட்டுவது எப்போதும் சாத்தியமில்லை.அவரைத்திட்டும்போது அந்தப்பெண் தனக்குள் சிரித்துக்கொள்வார்.அவரது தோழிகளில் சிலரும்தான்.உண்மையில்லாவிட்டாலும் தன்னுடன் பழகுவதால்தான் அதிகாரி திட்டுகிறார் என்று சொல்லிக்கொள்வார்.ஆமாம், மனம் அதிக துயரத்தால் பாதிப்புக்குள்ளாகும் சமயங்களில் தன்னிச்சையாக எண்ணங்களை உருவாக்குகிறது.

-

வருத்தப்படாத வாலிபர் சங்கத்தை முன்வைத்து...

நகைச்சுவை என்றால் யாருக்குத்தான் பிடிக்காமல் போய்விடும்? இன்றைய சூழலில் அது மருந்துபோல இறுக்கத்தைக் குறைக்க உதவுகிறது.தமிழ்சினிமாவிற்கு இது சிரிப்புயுகம்!.அரங்கில் நின்றுகொண்டு படம் பார்க்கும் ரசிகர்களை நீண்டகாலத்திற்குப்பிறகு  பார்த்தேன்.சில இடங்களில் விசில் சத்தம் காதைப்பிளக்கிறது.நண்பர் சொன்னார், காதல் தோல்வி பற்றி பாட்டு வந்தாலே இப்படித்தான்! எந்தப்படமாக இருந்தாலும் விசில் பறக்கும்.

காதலில் தோற்றுப்போன நிலையில் பாடும் பாடலுக்கு ஏன் இத்தனை சத்தம்? நண்பருக்கு நான் அப்போது பதிலை சொல்லவில்லை.பெண்ணை குறை சொல்வது அவர்களுக்கு பிடித்திருக்கிறது.தனது பிம்பமாக பார்க்கிறார்கள்.ஏராளமான இளைஞர்கள் காதல் தோல்வி அடைந்தவர்களா? ஏமாற்றப்பட்டவர்களா? 

ஒருதலைக்காதலில் தோல்வி அடைந்து தற்கொலைக்கு முயற்சி செய்த ஒரு பெண்ணை சந்தித்தேன்.கிட்டத்தட்ட உறவுக்கார பையன்.பையனுக்கு வேறு காதலி இருப்பது இப்பெண்ணுக்குத் தெரியாது. அவரும் என்னைக்காதலித்தார் ஆனால் சொல்லவில்லை.எனக்குத்தெரியாதா? என்று கேட்டார்.என் வீட்டைத்தாண்டி வண்டியில் போகும்போது ஹாரன் அடிக்காமல் போகமாட்டார் என்றார்.பெண்ணின் வீடு தெருமுனையில் அமைந்திருக்கிறது. ஹாரன் அடிக்காமல் பெரும்பாலானவர்கள் கடந்து செல்ல வாய்ப்பில்லை.

இளமையில் பலருக்கும் இப்படித்தான் நேர்ந்துவிடுகிறது.பார்ப்பதையும்,பேசுவதையும் காதலாக நினைத்துக்கொள்கிறார்கள்.அப்புறம் திரையரங்கில் விசிலடிப்பார்கள்.பெண்களை குறை சொல்லும்போது கைதட்டி உற்சாகம் கொள்வார்கள்.நம்மை ஒருவருக்குப் பிடிக்கவில்லை என்பதை யாராலும் தாங்கிக்கொள்ளவே முடியாது.

உடலுக்கு நோய் எதிர்ப்பு முறை இருப்பது உங்களுக்குத்தெரியும்.பாக்டீரியா உள்ளிட்ட நுண்ணியிரிகள்,விஷம் போன்றவை உடலுக்குள் நுழையும்போது உடல் புரதங்களை வெளியிட்டு தன்னைக்காத்துக்கொள்கிறது.உடலைப்போலவே மனசுக்கும் தன்னை தற்காத்துக்கொள்ளும் திறன் உண்டு.துயரம் விளைவிக்கும் எண்ணங்களை மாற்ற நனவிலிமனம் அதற்கான எண்ணங்களை உருவாக்குகிறது.

புற்றுநோய், எச்.ஐ.வி போன்ற பரிசோதனை முடிவுகளை சொன்னவுடன் சிலர் மறுப்பார்கள்.உண்மையான தகவலாக இருந்தாலும் துயரம் தருமென்றால் அப்படியெல்லாம் இருக்காது என்று சொல்வார்கள்.அவருக்குப்பிடிக்கவில்லை என்று பெண்ணோ,பெண்ணுக்கு என்னை பிடிக்கவில்லை என்று ஆணோ ஒருபோதும் சொல்லமாட்டார்கள்.வேறு ஏதேனும் காரணத்தை அவர்கள் சொல்லக்கேட்டிருக்கலாம்.

-