முளை கட்டிய உணவுகள்.

தானியங்களை முளை கட்டி சாப்பிடுவது எனக்குப் பிடித்தமான ஒன்று.ஆனால் நாவிற்கு சுவையானதாக இருக்காது. நட்சத்திர விடுதி ஒன்றில் பச்சைப்பயறு முளைகட்டி வைத்திருந்தார்கள்.விரும்பி போட்டுக்கொண்டு சாப்பிட்டவர்கள் ரொம்பக்குறைவு.குழம்பில் எப்போதும் எனக்குப் பிடித்தமானது பச்சைப்பயறுதான்.அதன் சுவைக்கு நான் அடிமையும் கூட! முளைகட்டிய பயறு ருசியாக இல்லாவிட்டாலும் சந்தோஷமாக சாப்பிட்டேன்.

சுவைக்கு முக்கியத்துவம் அளிப்பது நம்முடைய பண்பாடல்ல! ஆரோக்கியத்தை நோக்கமாக வைத்தே உணவுப் பழக்கங்கள் இருந்தன.வெயில் காலங்களில் குழம்பில் புளியைக் கொஞ்சம் அதிகம் சேர்ப்பார்கள்.சுவை குறைந்தாலும் சீக்கிரம் கெட்டுப்போகாது.உழைக்கும் மக்கள் மதியம் ஒரு முறை சமைப்பது சாத்தியமல்ல.காலையில் தயாரித்த உணவு மாலைவரை வரவேண்டும்.

சுவையாகவும் மேலும்மேலும் சாப்பிட்த்தூண்டும் முளைகட்டிய தான்யம் ஒன்று உண்டு.கம்பு முளைகட்டி சாப்பிட்டவர்களுக்கு இந்த அனுபவம் இருக்கும்.அதே போல கம்பு அடையும் அத்தனை சுவை.எளிதில் தயாரித்துவிடலாம்.இதெல்லாம் அதிகம் உழைப்பு தேவைப்படாத தின்பண்டம்.ஆனால் உடல் ஆரோக்கியத்தை உறுதி செய்வதில் இதன் பங்கு மகத்தானது.

இன்று வீட்டில் போதுமான நேரம் இருப்பதில்லை.கணவன்,மனைவி இரண்டு பேரும் சம்பாதிக்க ஓட வேண்டியிருக்கிறது.இன்றைய ஆரோக்கியமற்ற உணவுப்பழக்கத்துக்கு முக்கிய காரணம் இதுதான்.ஆனால் நேரமில்லாமல் ஓடிக்கொண்டிருப்பவர்களுக்கும்,உணவகங்களை நம்பி இருப்பவர்களுக்கும் முளைகட்டிய தானியங்கள் வரப்பிரசாதம்.

தானியத்தை பகல் முழுக்க ஊறவைத்து நீரை வடித்துவிட்டு சுத்தமான துணியில் கட்டி வைக்கவேண்டும்.முளை வந்த பிறகு சாப்பிடலாம்.கம்புக்கு சுவைக்காக வேறு எதுவும் தேவைப்படாது.பச்சைப்பயறு போன்றவற்றோடு வெல்லம் சேர்த்துக்கொள்ளலாம்.முளைகட்டிய பயறுகளை காயவைத்து உடைத்து சாம்பாருக்கு பயன்படுத்துவதும் உண்டு.

முளை கட்டிய தானியங்கள் அவற்றில் உள்ள உயிர்ச்சத்துக்களை அதிகப்படுத்தித் தருகின்றன.விட்டமின் சி,இ,பீட்டாகரோட்டின் போன்றவை தினசரி உயிர்ச்சத்து தேவையை உறுதிசெய்யும்.உடலுக்குத்தேவையான ஆண்டி ஆக்ஸிடெண்டுகளைப்பெற முடியும்.இன்றைய கதிர்வீச்சு,மாசு,தரமற்ற உணவுகள் போன்றவற்றால் ஏற்படும் செல் சிதைவிலிருந்து தடுத்து புற்றுநோய், இதயநோய் ஆபத்தைக் குறைக்க உதவும்.

உடலின் வளர்சிதை மாற்றத்துக்குத் தேவையான நொதிகளையும் முளைகட்டிய உணவின் மூலம் பெறலாம்.நார்ச்சத்து,அவசியமான கொழுப்பு அமிலங்கள்,புரதங்களைத் தருகிறது.நீடித்த இளமை,உறுதியான ஆரோக்கியம் மிக எளிய முறையில்,குறைந்த செலவில் கிடைக்கிறது.முயற்சி செய்து பார்த்தால் வித்தியாசத்தை உணரமுடியும்.

-

நெல்லிக்கனி-சி வைட்டமின் -திரிபலா

ஆண்டிபயாடிக் மருந்துகளுக்கு கட்டுப்படாத கிருமிகள் குறித்த அச்சம் நிலவுகிறது.இது குறித்த விரிவானபதிவை இத்தளத்தின் வாசகர்கள் ஏற்கனவே படித்திருக்க வாய்ப்புண்டு.படிக்காதவர்கள் சுட்டியை அழுத்திப் படிக்கவும்.மாத்திரைகள் சாப்பிடுவதுண்டா உஷார்!புதிய ஆய்வு முடிவு ஒன்றை படித்தேன்.தற்போதுள்ள காசநோய் மருந்துக்கு கட்டுப்படாத பாக்டீரியாக்களை சி வைட்டமின் அழித்துவிடுகிறது என்கிறது அந்த ஆய்வு.இதே வைட்டமின் ஆண்டி ஆக்ஸிடெண்டாக செல் சிதைவை தடுக்கிறது என்று சென்ற பதிவில் பார்த்தோம்.

ஆயிரம் மில்லிகிராம் வரை உணவில் சேர்க்கலாம் என்று அமெரிக்க மருத்துவர் ஒருவர் சொல்கிறார்.ஆனால் தினமும் மாத்திரைகளாக உண்பதை பலரும் ஆதரிக்கவில்லை.உணவு மூலம் அதிக அளவு சி வைட்டமினை பெறுவது இன்று நமக்கு முக்கியமான சவால்.உணவின் மூலம் குறைந்த செலவில் எப்படி பெறுவது? என்று ஒருவர் கேட்டார்.எலுமிச்சை விலை குறைவுதான்.மேலும் இதைப்பற்றிய சிந்தனையின் போது எனக்கு நினைவுக்கு வந்தவர்கள் வள்ளல் அதியமான் மற்றும் அவ்வையார்.

அதியமான் வள்ளலான கதை நமக்குத்தெரியும்.தமிழ் மரணமிலாப் பெருவாழ்வு வாழவேண்டுமென்று நினைத்திருக்கவேண்டும்.தனக்கு கிடைத்த நெல்லிக்கனியை அவ்வைக்குக் கொடுத்து வரலாற்றில் நீங்காத இடம் பெற்றான்.எங்கள் கிராமத்திலிருந்து மூன்று கிலோமீட்டரில் இருக்கிறது அதியமான்கோட்டை என்ற ஊர்.தமிழக அரசால் அதியமான்கோட்டம் கட்டப்பட்டுள்ளது.அவ்வை பெற்ற நெல்லிக்கனிக்கு மட்டுமல்ல! அனைத்து நெல்லிக்கனிக்கும் நீடித்த வாழ்வைத்தரும் ஆற்றல் உண்டு என்பதே நிஜம்.

 

உயிர்ச்சத்து சி ஆரஞ்சுப்பழத்தை விட இருபது மடங்கு அதிகமாக இருக்கிறது.ஆரஞ்சு அளவுக்கு பணம் செலவிட வேண்டிய அவசியம் இல்லை.இந்திய மருத்துவத்தில் நெல்லிக்காய் தொடர்ந்து சிறப்பிடம் பெற்றிருக்கிறது.ஆயுர்வேத,சித்த மருத்துவத்தில் ச்யவன்பிராஷ்,நெல்லிக்காய் லேகியங்கள் புகழ்பெற்றவை.சுவை காரணமாக நெல்லிக்காய் அதிகம் பயன்பாட்டில் இல்லை.ஊறுகாயாக,மருந்தாக மட்டுமே இருந்துகொண்டிருக்கிறது

.

உப்பு,காரம் சேர்த்து சாப்பிடுவது பலருக்கு பிடித்தமானது.பழச்சாறாக சில இடங்களில் பயன்படுத்துகிறார்கள்.முக்கியத்துவம் தெரிந்தவர்கள் உலர் நெல்லிக்கனியை மென்று கொண்டிருப்பதை பார்த்திருக்கிறேன்.கடைகளில் எப்போதும் கிடைத்துக்கொண்டிருக்கும்.உலர்ந்தபின்பும் அதில் உள்ள சத்துக்களில் மாற்றம் இல்லை என்கிறார்கள்.சூயிங்கம் போன்றவற்றை மெல்லுவதை விட இதில் ஏராள நன்மைகள் உண்டு.தூள் செய்யப்பட்டும் பயன்படுத்துகிறார்கள்.

இளமையை மீட்டெடுக்கும் கனியாக நெல்லிக்கனி தொடர்ந்து கொண்டாடப்பட்டு வருகிறது.முடியும் தோலும் இதனால் வளம் பெறுகின்றன.மேலும் கொலஸ்ட்ராலை சமநிலைப்படுத்த,இதயத்தை,கல்லீரலை பாதுகாக்க என்று நன்மைகள் ஏராளம்.ஆரஞ்சு போன்ற பழங்களை ஒப்பிடும்போது குறைந்த விலையில் அதிக சி வைட்டமினை நெல்லிக்காய் மூலம் பெறலாம்.

சென்றவாரம் நண்பன் ஒருவனை பார்த்து பேசிக்கொண்டிருந்தேன்.நெல்லிக்காய்,கடுக்காய்,தான்றிக்காய் சேர்த்து ஒருவர் தூளாக்கித் தருவதாகவும்,தினமும் பயன்படுத்துவதாக சொன்னான்.திரிபலா என்ற பெயரை அவன் கேள்விப்பட்டிருக்கவில்லை. மாதம் ஐம்பது ரூபாய் செலவாகிறது என்றான்.உடல் ஆரோக்கியமாக இருப்பதாகவும் சொன்னான்.குடலை சுத்தம் செய்து மலச்சிக்கலை போக்கும் மருந்தாக ஆயுர்வேத,சித்த மருத்துவத்தில் தரப்படுகிறது.திரிபலாவில் க்ரீன் டீயை விடவும் அதிக ஆண்டி ஆக்ஸிடெண்டுகள் இருப்பதாக படித்திருக்கிறேன்.

-

புற்றுநோய் மற்றும் இதயநோய் தடுக்கும் உணவுகள்?

                            புற்றுநோயைத்தடுக்க என்னென்ன சாப்பிடவேண்டும் என்று ஒருவர் கேட்டார்.புற்றுநோய்க்கு புகை,பரம்பரை,வேதிப்பொருட்கள் உள்ளிட்ட பல காரணிகள் இருக்கின்றன.உணவின் மூலமாக முற்றிலுமாக புற்றுநோயின் ஆபத்திலிருந்து தப்புவது சாத்தியமல்ல! ஆனால் சில உணவுகள் மூலமாக ஆபத்தை குறைத்துக்கொள்ள முடியும் என்று சொல்லப்படுகிறது.க்ரீன் டீ பற்றிபேசும்போதெல்லாம் புற்று நோய்,இதய நோய் வராமல் தடுக்கும் என்று சொல்வதை கேள்விப்பட்டிருப்பீர்கள்.க்ரீன் டீ பிரதேசமான ஜப்பானில் புற்றுநோய் மிகவும் குறைவாக இருக்கிறது.க்ரீன் டீயில் உள்ள ஆண்டி ஆக்சிடெண்டுகள்தான் காரணம்.

                               நமது உடலின் வளர்சிதை மாற்றத்துக்கு ஆக்ஸிஜனின் முக்கியத்துவம் பற்றி தெரியும்.ஆக்ஸிஜனின் வேதி மாற்றத்தின்போது உருவாகும் மூலக்கூறுகள்(free radicals-இலவச தீவிரவாதிகள் என்று கூகுள் மொழிபெயர்க்கிறது!) உடலில் உள்ள செல்களை சிதைக்கின்றன.புற்று நோய்,இதயநோய்,மறதி போன்ற ஏராளமான நோய்களுக்கு இந்த தீவிரவாதிகள் முக்கிய பங்கு வகிக்கிறார்கள்.புகை,மாசு,கதிர்வீச்சு போன்றவையும் மேற்கண்ட மூலக்கூறுகள் உருவாக காரணமாக இருக்கின்றன.இவற்றுக்குஎதிராக செயல்பட்டு செல்களை காக்கும் பணியை செய்பவற்றையே ஆண்டி ஆக்ஸிடெண்டுகள் என்கிறோம்.

                                ஆண்டி ஆக்சிடெண்டுகள் அதிகம் உள்ள உணவுகளை உண்பது இத்தகைய நோய்களின் ஆபத்தைக் குறைத்துக்கொள்ள உதவும்.உயிர்ச்சத்துக்கள் சி,இ,ஏ போன்றவை முக்கியமான ஆண்டி ஆக்ஸிடெண்டுகள்.இந்த உயிர்ச்சத்துக்களை அதிகம் உணவில் சேர்ப்பது நோய்களின் ஆபத்திலிருந்து குறைத்துக்கொள்ளும் வழியாக இருக்கும்.இவை தவிர உடலில் உள்ள என்சைம்களும் இப்பணியை செய்கின்றன.இவற்றுக்கு இரும்பு,செலினியம்,தாமிரம்,துத்தநாகம் போன்ற தாதுக்கள் தேவை.இத்தாதுக்கள் செரிந்த உணவுகளையும் சேர்க்கவேண்டும்.

                                 பொதுவாக மேலே சொல்லப்பட்ட உயிர்ச்சத்துக்களுக்கு பச்சை காய்கறிகள்,பழங்கள்தான் ஆதாரம்.நெல்லிக்காய்,கொய்யா,எலுமிச்சை,ஆரஞ்சு உள்ளிட்ட சிட்ரஸ் பழங்கள் விட்டமின் சி மிகுந்தவை.முளை கட்டிய தானியங்கள்,தாவர எண்ணெய்,பச்சை காய்கறிகள் போன்றவற்றில் விட்டமின் இ அதிகம் இருக்கிறது.பீட்டா கரோட்டின் வகையில் கேரட் முக்கியமானது.ப்ப்பாளி,பூசணி,கோஸ்,பூண்டுவெங்காயம் ஆகியவற்றை அதிகம் சேர்க்கலாம்.

                                  உயிர்ச்சத்துக்களை பழங்கள்,காய்கறிகளாக உண்பதை தவிர்த்து மாத்திரைகளாக உண்ணும் பழக்கம் அதிகரித்து வருகிறது.மாத்திரைகளில் அளவு அதிகமானால் பக்க விளைவுகள் உண்டு.ஆனால் சமையல்,குளிர்சாதனப்பெட்டியில் வைத்து பாதுகாப்பது போன்ற நிலைகளில் உயிர்ச்சத்துக்களை இழந்துவிடுகிறோம்.மாத்திரைகளாக உண்ணலாம் என்று சொல்பவர்களும் உண்டு.ஆண்டி ஆக்சிடெண்டுகள் உள்ளவற்றை அதிக அளவு உணவில் சேர்ப்பதே சரியானது.இவை தவிர நல்ல உறக்கமும்,போதுமான நீரும்,இறுக்கமில்லாத மனமும் சத்துக்கள் சரியாக உடலில் சேர அவசியமானவை.

-

நலம்பெறத் தவிர்க்கவேண்டிய உணவுகள்.

குப்பைகளை ஏன் தின்று கொண்டிருக்க வேண்டும்? இன்றைய தலைமுறை அப்படித்தான் இருக்கிறது.உடல் நலனுக்கு கொஞ்சமும் பயனளிக்காத உணவுகளை விழுங்கிக்கொண்டிருக்கிறது.junk  food என்றால் குப்பை உணவு என்றுதான் அர்த்தம்.இளம் வயதினர் கிட்ட்த்தட்ட அடிமையாகிப்போனார்கள் என்கிறது ஒரு ஆய்வறிக்கை.பீட்ஸா,பர்கர்,சிப்ஸ் என்று சுவைக்காக மட்டுமே இந்த வகைகள் விழுங்கப்படுகின்றன.

                                கார்பானிக் அமிலம் சேர்க்கப்பட்ட குளிர்பான்ங்கள் பற்றி பல விழிப்புணர்வு செய்திகள் வந்துவிட்ட்து.ஆனால் அதைக்காது கொடுத்து கேட்பவர்கள் இருப்பதாக தெரியவில்லை.காரணம் விளம்பரம்தான்.இதற்கான விழிப்புணர்வு செய்பவர்கள் அடையாளம் இல்லாதவர்கள்.குடிக்கச்சொல்பவர்கள் மதிப்புக்குரிய நடிகைகளும்,கிரிக்கெட் வீர்ர்களும்.மனிதனுக்கு சிறிதும் உபயோகமில்லாத ஒன்றை விளம்பரம் மூலம் விற்று மனிதனை முட்டாளாக்க முடியும் என்பதற்கு இது ஒரு நல்ல எடுத்துக்காட்டு.

                                 மக்கள் நலனில் விருப்பம் கொண்ட தனி மனிதர்களும்,அமைப்புகளும் இவற்றின் நன்மை,தீமையைப் பற்றி பேசுகிறார்கள்.யாரும் கேட்கவில்லை என்னும்போது அரசாங்கத்தை நாடுகிறார்கள்.அவர்களும் கண்டுகொள்ளாவிட்டால் இருக்கவே இருக்கிறது நீதிமன்றம்.இந்தியனுக்கு இருக்கும் கடைசி நம்பிக்கை நீதிமன்றங்கள்தான்.குப்பை உணவுகள் விவகாரமும் இப்போது நீதிமன்றம் போயிருக்கிறது.

                                  டெல்லி உயர்நீதிமன்றத்தில் உதய் ஃபவுண்டேஷன் என்ற அமைப்பு வழக்கு தொடர்ந்திருக்கிறது.குறைந்த பட்சம் பள்ளி,கல்லூரிகளிலாவது இவற்றை தடை செய்யலாம் என்பது கோரிக்கை.நன்மையளிக்காத உணவுகளையும்,குளிர்பான்ங்களையும் 1500 அடிக்குள் விற்பனை செய்வதை தடை செய்யவேண்டும் என்கிறார்கள்.மத்திய அரசுக்கு நோட்டீஸ் போயிருக்கிறது.ஓரளவுக்காவது இதன் நுகர்வை இளைஞர்களிடமிருந்து குறைக்க முடியும் என்பதே நோக்கம்.

                                 இந்த வகை உணவுகளில் நுண்ணூட்டச்சத்துக்கள் எதுவும் இல்லை.தினசரி அத்யாவசியத் தேவையான வைட்டமின்கள்,தாதுக்கள்,அமினோ அமிலங்கள்,நார்ச்சத்து போன்றவை இல்லாத குப்பைகள்.ஆனால் இவற்றை தின்பது மட்டும் அதிகரித்தவாறு இருக்கிறது.மது,புகை போன்றவை போல எதிர்த்துப்போராடும் நிலை ஏற்பட்டு விட்ட்து.அதே சமயம் மது,புகை போன்றவற்றிற்கு இருக்கும் உளவியல் காரணிகள் இவற்றுக்கு பொருந்தாது.

                                 அவர்கள் காசில்தானே தின்கிறார்கள் எங்கோ போகட்டும் என்று விட்டுவிடலாமா? இதன் மூலம் ஏற்படும் உடல் பருமன்,இதய நோய்கள்,சர்க்கரை,பல் வியாதி போன்றவை எதிர்காலத்தில் இந்திய சுகாதாரத்திற்கு பெரும் அச்சுறுத்தலாக இருக்கும்.ஏராளமானவர்கள் நோயாளிகளாக இருப்பார்கள்.உழைக்கும் இந்தியர்களின் எண்ணிக்கையில்  குறைவு ஏற்படும்.பொருளாதாரம் பாதிக்கப்படும்.இன்னொரு பக்கம் நோய்களுக்கு சிகிச்சை வகையிலும் அரசு செலவு செய்யவேண்டும்.

                                 இன்று வசதி படைத்தவர்கள்கூட நீரிழிவு,இதய நோய் மாத்திரைகளுக்காக அரசு மருத்துவமனையை நாடுகிறார்கள்.வாழ்வு முழுக்க செய்யும் செலவை குறைக்க முயற்சி செய்கிறார்கள்.குப்பை உணவுகளும் இத்தகைய நீண்டகால நோய்களை உருவாக்க்க்கூடியவை.இதனால் பல வகையிலும் நாட்டிற்கு இழப்பு இருக்கிறது.இப்போதே விழித்துக்கொண்டால் நல்லது.

-